今日雷大囡考完試帶左佢地去呢度玩😆😆
係一次好好嘅體驗👍🏻👍🏻 多謝晒靚女姐姐邀請我地☺️☺️
今日雷大囡有一個新嘗試，無論佢做得好唔好都唔緊要，試過玩過體驗過。大個諗返回憶都應該係美好嘅。起碼多一件事可以同自己個囡分享吖😆😆。
（因為我超鐘意乜都同個囡分享）
而我自己都有好深嘅領會...
教小朋友真係一門好高深嘅學問，而且係冇實質課程可以讀。更加冇實習堂上。雖然坊間有好多 #如何教好子女 類似嘅教學班、親子班... 但係每個小朋友性格唔同，點可以一概而論呢？
雷大囡同雷小囡性格好唔同。一靜一動，一個思考型，一個衝動派...對住佢地差啲攪到我思覺失調，精神分裂。無時無刻一人分飾兩角咁....
家姐從小就好乖好聽話，服從性高，凡事思前想後。所以佢成績好好。但顧慮太多。唔敢直接表達自己。都怪我自己太遲了解佢個性，以為每個小朋友都要「聽教聽話」原來呢套唔係適合每個人身上。所以而家我日日都鼓勵佢「可以唔洗咁乖」...
（🤨🤨媽咪係咪傻架？）其實只希望佢可以過得更開心。
阿妹就相反，專同人作對。你越叫佢唔好做，佢就越要偷偷地做。所以經常都要俾佢「撞下板」佢先唔敢再犯。而因為咁，佢會比較敢於嘗試，想像力豐富。而以湊家姐嘅經驗黎講。因為過早學太多「興趣班」令佢多左框架限制。所以阿妹乜都唔會俾佢學。（阿妹通常資源少啲😆😆）
所以教佢地嘅時候，一個要教壞佢，另一個要教乖佢。轉數慢啲都唔得。對住佢地真係日日死唔少腦細胞，白頭髮都出多幾條...好攰。
不過好感恩，呢2姊妹感情好好，見到佢地一齊玩一齊笑，真係咩煩惱都「暫時」冇晒。（暫時是重點😅）
所以，我覺得對小朋友最好嘅方法就係愛，細心同無限量嘅耐性。
雷囡s,媽咪愛你地😘希望你地可以一世都咁開開心心，相親相愛☺️☺️
Ps.有開心同唔開心記得同媽咪分享呀,媽咪一定支持你😘😘😘
Search